عتقوني أخواتي بنتي غاتهبلني
 

عندي بنت عاد دخلت لدراسة في سنها قريبة دير اربع سنوات لمشكل لقيتو معاها عويييييييييييص جدا ماعرفتش شنو ندير لدرجة المعلمات دياولها قالو لي لقينا معاها صعوبة واش ماكتفهامناش لا ننا في دولة أوروبيية وبنتي كتهدر بالعربية الا كنت أنا كنهدر معاها بالعربية ومافهماتنيش فمابالكن باللغة لي مكتعرفش لمهم المشكل فين ملي كنحط ليها قلم فوق الطبلة كنقولها شحال عندنا من قلم فوق الطبلة كتقولي تلا تة وعييت ونفس العملية كررتها على بزاف ديال الحوايج وكل مرة كتعطيني جواب مرة 5 ومرة 3 ومرة 2 صافي عقلي غادي يخرج الى كان عندكم شي طريقة باش
نفهم بنتي عتقوني بيها الله يجاز يكم بخير*

كنتمني ممن أخوات يفيدوكي

السلام عليكم

اختي صبرا على ابنتك قبل ما تكرهك من دابا

بما انك بدولة اوروبية فالحل ساهل و هو الترويض lorgopedie

نفس المشكل انا عندي مع وليداتي كولهوم لان بالمنزل ممنوع منعا كليا اللغة الاجنبيةالا الدارجة ديالنا لان اللغة الاجنبية عندهوم لي يعلمها ليهوم اما المغربية ما كاينش لي يعلمهاليهوم الا الاسرة

اختي كيف ما قلت ليك وليداتي فاول الامر كنرسلهوم للحضانة و هما صغار فالنهار مع اللغة الاجنبية و في المساء ما تيسر من الساعات العربية و رغم ذلك كتكون عندهوم مشكلة كبيرة منين كيديرو 5 سنوات و خاصهوم يدخلو لروض الاطفال

رغم انهوم كيحبو يمشيو للمدرسة كيكون عندهوم انطواء و عدم مسايرة الاطفال الاخرين و كذلك عدم الشعور بايجاد اللغة الاجنبية كيجعلهوم احيانا عدوانيين

لكن هنا ادارة المدرسة كتدخل و كتطلب من الاباء باش الاولاد ديالهوم يديرو حصص الترويض بالمجان و الدولة لي كتدفع الفاتورة

و من خلال الحصص ديال الترويض لانهوم اختصايين في ذلك الطفل كيبقى يبان لي الضوء و يندمج و ينتبه و يعرف يحسب الارقام و يفرق ما بين الالوان

اختي اعطي لبنتك الوقت راها صغيرة و عليك بالترويض و ان شاء الله دابا تبقى تعرف احسن منك و انت لي اطلبيها تشرح بعض الاشياء

كتعرفي المثل لي كيقول علمناهوم حرنا فيهوم

تمتعي معاها بهذ السن و كل حاجة و لو خطا تمتعي بيه و قولي الحمد لله لي اعطاني وليداتي نشغل معاهوم وقتي و ان شاء الله تكبر و تمر الايام بلا ما تحسي بيها و تبقى الا الذكريات و احرصي بان تكون ذكريات جميلة خالية من الترهيب و خصوصا بالدراسة

و الله ولي التوفيق

تماما اختي ...كما قالت ليك غصن ...لو كنتي مازال في المغرب ممكن نقول لك الوضع يجيك صعيب وعلى في الدول الاوربية

الامور احسن من عندنا بكثييييييير ...حاولي تشوفي مع شي طبيب متخصص في الاطفال الا ما تتعرفيش من ايت تبدئين وهو اكيد غدي يوجهك بالظبط لفين تمشي .... على حد علمي كتكون واحد المسؤولة على الحالة والصحة النفسية ديال التلاميد والاطفال

شوفي واش كاينة في المدرسة فاش كاينة بنتك ؟؟؟؟؟

وغير بالخاطر اختي وكلشي ان شاء الله يهون ويفوت ...غير ما تزيريش على البنت من الاول

وحبيبيها في المدرسة والخروج ليها ... وتا انت ما تتعصبيش حاولي تحطي اعصابك في الفريزر ....

وربي ييسر الامور


وطمنينا عليها وعلى اي خطوة اتخدتي ....

اللهم يسر ولا تعسر

وربي يحفظها ليك

شكرًا ليكم أخواتي على ردودكن لي ريحاتني المشكل ديالي أني تنتعصب معاها وتخيلو معايا أنا دابا تنكتب ليكم وسولتها شحال من ورقة فوق الطبلة قالتلي واحدة بقيت كنقول داك لغوت ديالي وقيلا كيخاليها تخاف وبالتالي مكتعرفش تجاوبني اوا الله يرزقنا الصبر معاهم ويحفظهوم لينا من كل شر

اختي احلام ...نقول ليك واحد الحاجة وحاولي تخليها حقلة في ودنك على قولت المصريين

اختي راه اغلب المشاكل اللي تنلقاوها في اولادنا احنا السبب ديالها ..خصوصا احنا الامهات

راه ديك العصبية اللي فينا تنديرو بيها مصائب الا ما فقنا في الوقت المناسب وخدينا بزمام الامور


اللي بغيت نقول لك

صدقيني اختي راه ...غير تنولدو وليداتنا...راه ضروري ما نديرو عاوتني اعادة التاهيل لانفسنا من خلال تصرفتنا

خصوصا خصوصا قدام اولادنا
يعني


تنعاودو نربيو ريوسنا بريوسنا على حسب الوقت اللي ولينا فيه

يعني راه ضروري ما تعاودي الحسابات ديالك في تعاملك مع بنت

وتا في تصرفاتك وطريقتك في الكلام معاها ...

هدشي تنققولو ليك وراني هادي سنوات وسنوات باش تنخدم على راسي وباااااااااااااقي خاصاني الخدمة

تنهدرو على الناس اللي معصبين شوية يعني

اما الناس اللسي عطاهم ربي الخاطر موسع هدوك سعداتهم

راني كنت معصبة معولدي الاول لكبر درجة ممكن تخيليها ... ولكن لقيت داك الحساب ما شي هو هداك

واعدت حساباتي وولتي شوية بشوية تنخدم على راسي عاد نلوم ولادي

فهتيني يا قمر ؟؟؟؟

اوا اعطي الخاطر لراسك ولبنتك

موفقة حبوبة

اختي اميناس عنداك الحق ونتمنا من الله يعاوني باش نهدأ. من أعصابي ونبرّد شوية

غير صبري معاها راه باقا صغيرة ويالاه الشهورة لولين فالمدرسة وعطيها الخاطر وحاولي متعصبيش ديري لي كالو ليك الاخوات والله يحفظها ليك من كل شر

سلام عليكم
ختي احلام على ما عرفت نتي في فرنسا حيت حتى انا هنا
عندي جارتي عندها نفس لموشكيل ديال بنتك او حتى هي عندها 4 او 5 سنين او لمدرسه لي قتارحات عليها دروس التقويه او ترويض من بعد ما كيخرجو دراري لبنيه تتبقا في لمدرسه واحد ساعه
ما عندك منهاش تخافي ، ان شاء الله لموشكيل اتحل ، او اهم حاجه ديري معاها لخاطر او ما تبقايش تغوتي عليها راك تخلعيها او في الاخير ما تلقاي حتى نتيجه
الله احفظ ليك لبنيه او اخليها ليك

سلام وعليكم اختى احلام معندك علاش تقلقى
عادى بنتك في هاد السن يوقع ليها هايدا الى كانت مولفة معاك ومشات للمدرسة راه لقات صعوبة في الاحتكاك واش هاد المدرسة مافيهاش مختصيين راه الاخوات قالو لك المفيد
دابا راه كاين مدارس حتى في المغرب عندهوم مختصين كايشوفو سلوك الاطفال وفوقاش كايوجب التدخل ديالهوم
وحاجة مهمة بزاف ملى ترجاع من المدرسة متحطلهاشي كتب وادوات وتبقى توريها راه غادى تمل وخصوصا فسنها باقي باغيين يلعبو
حببها في الاقلام وفي الاوراق عن طريق الرسم
خصصي وقت ليها
مثلا اجى نرسمو هلال او طائر او اى حاجة كتعجبها
ولاو غير خربطة المهم وانتى كتلعب معاها علمها غير بدكاء بلا غوات حيث الغوات راه يقدر يرعبها
وتخاف عندك تجاوبك ويكون غلط وتغوت عليها او تضربها
مثلا تقدر تقولها اعطينى جوج ملونات او مدلى ملون واحد وهى غادى تفهم غير بهدوء
الله يسر الامور وييهدينا عليهوم ويهديهوم لينا